 |
| ಕವಲುಬಾಲದ ಚಿಟವ |
ಬೆಂಗಳೂರಿನಿಂದ ಹೊರಟಿದ್ದು ಹುಲಿಯೂರುದುರ್ಗದ ಬಳಿಯಿರುವ ದೀಪಾಂಬುಧಿ ಕೆರೆಗೆ. ಕೆರೆಯ ತುಂಬಾ ನೀರಿತ್ತು. ಹಾಗಾಗಿ ನೀರ ಪಕ್ಷಿಗಳ ಸಂಖೈ ಇಲ್ಲವೇ ಇಲ್ಲ ಎನ್ನುವಷ್ಟು ಕಡಿಮೆಯಿತ್ತು. ನೀಲಿಬಾಲದ ಕಳ್ಳಿಪೀರಗಳು ಅಲ್ಲಲ್ಲಿ ಹಾರಾಡುತ್ತಿದ್ದವು. ಇನ್ನಿಲ್ಲಿ ಅಷ್ಟು ಫೋಟೋಗ್ರಫಿ ಆಗುವುದಿಲ್ಲವೆಂದುಕೊಂಡು ಹುಲಿಯೂರುದುರ್ಗ - ನಾಗಮಂಗಲ ರಸ್ತೆಯಲ್ಲಿರುವ ಮುತ್ತುರಾಯನ ಕೆರೆಯ ಕಡೆಗೆ ಹೋಗೋಣವೆಂದುಕೊಂಡೆ. ದೀಪಾಂಬುಧಿ ಕೆರೆಯಿಂದ ಹತ್ತದಿನೈದು ನಿಮಿಷದ ಪಯಣ. ಮುತ್ತುರಾಯನ ಕೆರೆಯಲ್ಲಿ ಈ ಮುಂಚೆ ಸೂಜಿಬಾಲದ ಬಾತು (ನಾರ್ತನ್ ಪಿನ್ ಟೈಲ್) ಪಕ್ಷಿಗಳನ್ನು ಕಂಡಿದ್ದೆ. ಹದಿನೈದು ಇಪ್ಪತ್ತು ಪಕ್ಷಿಗಳನ್ನು ನೋಡಿದ್ದ ನೆನಪಿತ್ತು. ಜೊತೆಗೆ ಅಲ್ಲೇ ಇರುವ ದೇಗುಲದ ಬಳಿ ಕರಿ ಎದೆಯ ನೆಲಗುಬ್ಬಿ (ಆ್ಯಶಿ ಕ್ರೌನ್ಡ್ ಸ್ಪ್ಯಾರೋ ಲಾರ್ಕ್) ಇದ್ದವು. ಈ ಬಾರಿಯೂ ಅವುಗಳೆಲ್ಲಾ ಕಾಣಸಿಬಹುದಾ ಎಂದುಕೊಳ್ಳುತ್ತಾ ಕೆಂಕರೆ ಊರು ದಾಟಿದ ನಂತರ ಸಿಗುವ ಕೆರೆಯಂಗಳವನ್ನು ತಲುಪಿದೆ. ಕೆರೆಯ ಪಕ್ಕ ನಡೆದು ಹೋಗುವ ದಡದಲ್ಲಿದ್ದ ಒಂದು ಜೋಡಿ ಸೂಜಿಬಾಲದ ಬಾತುಗಳು, ಮೂರ್ನಾಲ್ಕು ಬಿಳಿಹುಬ್ಬಿನ ಬಾತುಗಳು (ಗಾರ್ಗನೆ), ಐದಾರು ವರಟೆಗಳು (ಸ್ಪಾಟ್ ಬಿಲ್ಡ್ ಡಕ್) ನೀರಿಗಿಳಿದು ಎದುರಿನ ದೂರದ ದಡದ ಕಡೆಗೆ ಸಾಗಿಬಿಟ್ಟವು. ಒಂದಷ್ಟು ಗುಳುಮುಳುಕಗಳು ನನ್ನ ಆಗಮನಕ್ಕೆ ಭಯ ಬೀಳದೆ ಅಲ್ಲೇ ದಡದ ಬಳಿಯಲ್ಲೇ ಮುಳುಗೇಳುತ್ತಿದ್ದವು. ನದಿ ರೀವಗಳು (ರಿವರ್ ಟರ್ನ್) ಗದ್ದಲವೆಬ್ಬಿಸುತ್ತ ಜಗಳವಾಡುತ್ತ ಹಾರಾಡುತ್ತಿದ್ದವು. ಅಲ್ಲೇ ಒಂದು ಬದಿಯಲ್ಲಿ ಶೇಖರಣೆಯಾಗಿದ್ದ ನೀರಿನಲ್ಲಿ ಕೆಂಪು ಟಿಟ್ಟಿಭ ನಿಂತಿತ್ತು. ಜನರನ್ನು ಕಂಡೊಡನೆಯೇ ದೊಡ್ಡ ದನಿಯಲ್ಲಿ ಶಬ್ದ ಮಾಡುತ್ತ ಇತರೆ ಪಕ್ಷಿಗಳಿಗೆ ಎಚ್ಚರಿಕೆಯ ಸಂದೇಶ ನೀಡುವ ಟಿಟ್ಟಿಭ ಇಂದ್ಯಾಕೋ ಮೌನದಿಂದಿತ್ತು.
ಹಿಂದಿನ ಭಾಗವನ್ನು ಓದಲು ಇಲ್ಲಿ ಕ್ಲಿಕ್ಕಿಸಿ
ಅದರದೊಂದು ಸಾಧಾರಣ ಎನ್ನಿಸುವ ಫೋಟೋ ತೆಗೆದುಕೊಂಡು ಮುಂದೆ ಸಾಗಿದವನಿಗೆ ಕೆರೆಯಿಂದ ನೀರನ್ನೆತ್ತಲು ಹಾಕಿದ್ದ ಹಳೆಯ ಪೈಪೊಂದರ ಬಳಿಯಿದ್ದ ಮರಳಿನಲ್ಲಿ ಮರಳಿನದೇ ಬಣ್ಣದ ಪುಟ್ಟ ಪಕ್ಷಿಗಳು ಕಂಡಂತಾಯಿತು. ಗಮನವಿಟ್ಟು ನೋಡಿದಾಗ ಸರಿಸುಮಾರು ಮೂವತ್ತು ಕವಲುಬಾಲದ ಚಿಟವಗಳು (ಸ್ಮಾಲ್ ಪ್ರಾಟಿನ್ ಕೋಲ್) ಕಂಡವು. ಅಲ್ಲೇ ಇದ್ದ ವಿದ್ಯುತ್ ತಂತಿಯ ಮೇಲೆ ಕುಳಿತಿದ್ದ ಅಂಬರಗುಬ್ಬಿಗಳು (ಸ್ವಿವ್ಟ್) ಹಾರಿ ಹೋದವು. ಕೆಲವು ಕ್ಷಣದ ನಂತರ ಒಂದರ ಹಿಂದೊಂದು ಬಂದು ಮತ್ತದೇ ತಂತಿಯ ಮೇಲೆ ಕುಳಿತವು. ಚಿಟವಗಳ ಚಿತ್ರವನ್ನು ದೂರದಿಂದ ತೆಗೆದು ಅಲ್ಲೇ ಕುಳಿತು. ಒಂದೈವತ್ತು ಅರವತ್ತು ಅಡಿಯಷ್ಟು ಅಂತರವಿತ್ತು ನನಗೂ ಆ ಪಕ್ಷಿಗಳಿಗೂ. ಸೂಕ್ಷ್ಮವಾಗಿ ಗಮನಿಸದೇ ಹೋದರೆ ಈ ಪಕ್ಷಿಗಳ ಇರುವಿಕೆಯೇ ತಿಳಿಯುವುದಿಲ್ಲ.
ಪುಟ್ಟ ಪಕ್ಷಿಗಳು, ಮೈಬಣ್ಣ ಸಂಪೂರ್ಣ ಮರಳಿನದೇ. ಹೊಟ್ಟೆಯ ಭಾಗ ಬಿಳಿ. ಕೊಕ್ಕಿನ ಕೆಳಗೊಂದು ಕೆಂಪುಗೆರೆ. ಹೊಟ್ಟೆಯುಬ್ಬಿಸಿ ನಿಂತರೆ ಗುರುತಿಸುವಿಕೆ ಸುಲಭ. ಮೈ ಮುದುರಿಕೊಂಡು ನೆಲದ ಮೇಲೆ ಮಲಗಿದಂತೆ ಕುಳಿತರೆ ಕಾಣುವುದು ಕಠಿಣ. ನಿಧಾನಕ್ಕೆ ಪಕ್ಷಿಗಳ ಹತ್ತಿರಕ್ಕೆ ಸಾಗೋಣವೆಂದುಕೊಂಡು ಕ್ಯಾಮೆರಾವನ್ನು ನೆಲದ ಮೇಲಿಟ್ಟು ಅಂಗಾತ ಮಲಗಿಕೊಂಡೆ. ಪಕ್ಷಿಗಳು ಕ್ಯಾರೇ ಅನ್ನಲಿಲ್ಲ. ಎರಡು ನಿಮಿಷ ಹಾಗೆಯೇ ಮಲಗಿದ್ದು ನಂತರ ಕ್ಯಾಮೆರಾವನ್ನು ಎರಡಡಿ ಮುಂದೆ ಇಟ್ಟು ನಾನೂ ತೆವಳಿದೆ. ಹೀಗೆ ಒಂದು - ಎರಡಡಿ ನಿಧಾನಕ್ಕೆ ಪಕ್ಷಿಗಳೆಡೆಗೆ ತೆವಳುತ್ತಾ ಮುಕ್ಕಾಲು ಘಂಟೆಯಲ್ಲಿ ಪಕ್ಷಿಯಿಂದ ಏಳೆಂಟು ಅಡಿ ಹತ್ತಿರಕ್ಕೆ ಬಂದಿದ್ದೆ. ಮಧ್ಯೆ ಮಧ್ಯೆ ಫೋಟೋ ತೆಗೆಯುತ್ತಿದ್ದೆ. ಮಲಗಿಕೊಂಡ ಭಂಗಿಯಲ್ಲೇ ಅವುಗಳ ವರ್ತನೆಯನ್ನು ಗಮನಿಸುತ್ತಿದ್ದೆ. ಆಹಾರ ಹುಡುಕಲೋಗಿದ್ದ ಪಕ್ಷಿಗಳು ಈ ಸ್ಥಳಕ್ಕೆ ಬಂದು ದಡದಲ್ಲಿದ್ದ ಕೆರೆಯ ನೀರಿನಲ್ಲಿ ಮೈತೊಳೆದುಕೊಂಡು ತಂಪು ಮಾಡಿಕೊಂಡು ದಡದ ಮೇಲೆ ಬಂದು ನೀರು ಕೊಡವಿ ಮರಳಿನಲ್ಲೊಮ್ಮೆ ಜಳಕ ಮಾಡಿಕೊಂಡು ವಿರಮಿಸುತ್ತಿದ್ದವು. ಪಕ್ಷಿಗಳು ಪುಟ್ಟದಾದರೂ ರೆಕ್ಕೆಗಳು ವಿಶಾಲವಾಗಿದ್ದವು. ದೇಹಕ್ಕಿಂತ ಮೂರು ಪಟ್ಟು ದೊಡ್ಡ ರೆಕ್ಕೆಗಳು (ದೇಹದ ಗಾತ್ರ - ೬.೫ರಿಂದ ೭.೩ ಇಂಚು; ರೆಕ್ಕೆ - ೧೭ರಿಂದ ೧೯ ಇಂಚು). ಚೋರೆಹಕ್ಕಿಯಂತೆ (ಸ್ಪಾಟೆಡ್ ಡವ್) ಗಂಟಲುಬ್ಬಿಸಿಕೊಂಡು ಸದ್ದು ಮಾಡುತ್ತಿದ್ದವಾದರೂ ನದಿ ರೀವಗಳ ಜೋರು ಗಲಾಟೆಯಲ್ಲಿ ಇವುಗಳ ಶಬುದ ಸರಿಯಾಗಿ ತಿಳಿಯಲಿಲ್ಲ. ಕವಲುಬಾಲದ ಚಿಟವಗಳು ಚಳಿಗಾಲದಲ್ಲಿ ನಮ್ಮ ದೇಶಕ್ಕೆ ಬರುವ ಹಕ್ಕಿಗಳೆಂದು ತಪ್ಪು ತಿಳಿದಿದ್ದೆ. ಇವು ನಮ್ಮ ದೇಶದಲ್ಲೇ ವರ್ಷಪೂರ್ತಿ ಇರುವ ಪಕ್ಷಿಗಳು. ಉತ್ತರದ ಕಡೆಯಿರುವ ಪಕ್ಷಿಗಳು ಚಳಿಗಾಲದ ಸಮಯದಲ್ಲಿ ದಕ್ಷಿಣದ ಕಡೆಗೆ ಬರುತ್ತವೆ.
 |
| ಸ್ನಾನ ಮಾಡಲು ಅಣಿಯಾಗುತ್ತಿರುವ ಕವಲುಬಾಲದ ಚಿಟವ |
 |
| ಮೆಟ್ಟುಗಾಲು ಹಕ್ಕಿ |
 |
| ಗದ್ದೆ ಗೊರವ |
ಸೂರ್ಯ ಮುಳುಗುತ್ತಿದ್ದ. ನಿಧಾನಕ್ಕೆ ಚಿಟವಗಳಿಂದ ದೂರಾಗಿ ಎದ್ದು ಕುಳಿತೆ. ಎರಡು ನಿಮಿಷದ ನಂತರ ಮೇಲೆದ್ದೆ. ಒಂದಷ್ಟು ಚಿಟವಗಳು ಈಗಷ್ಟೇ ನನ್ನನ್ನು ಗಮನಿಸಿದಂತೆ ಮಾಡಿ ಹಾರಿ ಹೋದರೆ ಮತ್ತೊಂದಷ್ಟು ಅಲ್ಲೇ ಉಳಿದವು. ಹಾರಿ ಹೋದ ಹಕ್ಕಿಗಳೂ ಸಹ ನಿಧಾನಕ್ಕೆ ಅದೇ ಜಾಗಕ್ಕೆ ಹಿಂದಿರುಗಿದವು. ಮುಳುಗುತ್ತಿದ್ದ ಸೂರ್ಯನ ಒಂದೆರಡು ಫೋಟೋಗಳನ್ನು ತೆಗೆದುಕೊಂಡು ಹೊರಡುವ ಸಮಯದಲ್ಲಿ ಕೆಂಕರೆಯವರಾದ ಸುರೇಶ್ ಮಾತನಾಡಿಸಿದರು. ಇನ್ನೂ ಪಕ್ಷಿಗಳು ಬಂದಿಲ್ಲ ಈ ವರ್ಷ, ದೊಡ್ಡ ದೊಡ್ಡ ಪಕ್ಷಿಗಳು ಸಹ ಬರ್ತವೆ ಎಂದರು. ದೊಡ್ಡದು ಅಂದ್ರೆ ತುಂಬಾ ದೊಡ್ಡದು, ಬಿಳಿ ಸ್ವಲ್ಪ ಕಂದು ಬಣ್ಣವಿರ್ತದೆ ಅಂದರು. ಹೆಜ್ಜಾರ್ಲೆಗಳಿರಬೇಕು ಎಂದುಕೊಂಡು ಕ್ಯಾಮೆರಾದಲ್ಲಿಯೇ ಇದ್ದ ಕೊಮ್ಮಘಟ್ಟದ ಹೆಜ್ಜಾರ್ಲೆಗಳ ಫೋಟೋ ತೋರಿಸಿ ಇದೇನಾ ಎಂದೆ. ಇನ್ನೂ ದೊಡ್ಡಕಿರ್ತವೋ ಏನೋ ನಾವದಕ್ಕೆ ಪರ್ವತ ಅಂತ ಕರೀತಿವಿ ಅಂದರು. ಕ್ಯಾಮೆರಾದ ಪುಟ್ಟ ಪರದೆಯಲ್ಲಿ ಹೆಜ್ಜಾರ್ಲೆಗಳ ಬೃಹತ್ ಗಾತ್ರ ಅರಿವಿಗೆ ಬರಲಿಲ್ಲವೋ ಅಥವಾ ಇನ್ಯಾವುದಾದರೂ ದೊಡ್ಡ ಗಾತ್ರದ ಪಕ್ಷಿ ಇದೆಯೋ ಗೊತ್ತಾಗಲಿಲ್ಲ.
(ಒಂದಷ್ಟು ದಿನಗಳ ಬಳಿಕ ಪಟ್ಟೆ ತಲೆ ಹೆಬ್ಬಾತುಗಳಿಗೆ - ಬಾರ್ ಹೆಡೆಡ್ ಗೂಸ್ - ಪರ್ವತ ಪಕ್ಷಿ ಎಂದು ಕರೆಯುತ್ತಾರೆಂದು ತಿಳಿಯಿತು. ಇ ಬರ್ಡ್ ತಂತ್ರಾಂಶದಲ್ಲಿ ಗಮನಿಸಿದಾಗ ಮುತ್ತುರಾಯನ ಕೆರೆಗೆ ಪಟ್ಟೆ ತಲೆ ಹೆಬ್ಬಾತುಗಳು ಭೇಟಿ ಕೊಡುತ್ತಾವೆಂದು ವರದಿಯಾಗಿತ್ತು)
01/02/25 ಸಂಜೆ
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ