ನೋಡೊಮ್ಮೆ ನಿನ್ನೊಳಗೇ

 ಪ್ರವೀಣಕುಮಾರ್ .ಗೋಣಿ
ಮನಸು ಬೇಸತ್ತು ಹೋದಾಗ
ತನುವ ಸತುವೆಲ್ಲ
ಆವಿಯಾದಂತಾಗಿ ಬಳಲಿದಾಗ
ಬತ್ತದಂತಿರುವ ಉಲ್ಲಾಸದ
ನಿನ್ನದೇ ಅಂತರ್ಯವನ್ನೊಮ್ಮೆ ಇಣುಕಿ ನೋಡು .

ದಾರಿಗಳೇ ಕಾಣದಾಗಿ
ಕಣ್ಣಿಗೆ ಕಗ್ಗತ್ತಲಾವರಿಸಿ ನಿಂತು
ಸಾಕೆಂದು ಕೈಚೆಲ್ಲಿ ಕೂತಾಗ
ತಗ್ಗಿಸಿದ ನೆತ್ತಿ ಇಟ್ಟುಕೊಂಡೆ
ಒಂದು ಕ್ಷಣಕ್ಕೆ ಅಂತರ್ಯವನ್ನೊಮ್ಮೆ
ಇಣುಕಿ ನೋಡು .

ಅದೆಲ್ಲೋ ಅಲೆದಾಡಿ
ಸ್ಪೂರ್ತಿಗೆ ಹಾತೊರೆದು
ಬಡವನಾಗುವುದಕ್ಕಿಂತ
ನಿನ್ನೊಳಗಿನ ಅಚ್ಯುತವಾದ
ಚೈತನ್ಯವನ್ನೊಮ್ಮೆ ಇಣುಕಿನೋಡು .

ಹೊರಗಿನ ಬಂಧುಗಳಿಗಿಂತ
ನಿನ್ನಾತ್ಮವನ್ನೇ ನೆಚ್ಚಿ ನೋಡು
ತುಚ್ಛವಾಗಿ ನೋಡಿದವರೆದರು
ಉಚ್ಚವಾಗಿಸುವ ಶಕ್ತಿ ಅದಕಿಹುದು .