ಹೇಗೆ ?

ಪ್ರವೀಣಕುಮಾರ್ ಗೋಣಿ

ಉಕ್ಕಲಾಡುವ ಭಾವಗಳ
ತೊರೆಗೆ ಹರಿದು ಸಾಗುವ
ಹರಿವಿಲ್ಲದಾಗಿರಲು
ಹಾಡೊಂದು ಮೂಡಿತಾದರೂ ಹೇಗೆ ?

ಸಾಗಬೇಕೆನ್ನುವ ದಾರಿಗಳೆಲ್ಲ
ಮುಂದೆ ಹಾದಿಯಿಲ್ಲದಂತೆ
ಕಂದಕವೇ ನಿಲ್ಲುತ್ತಿರಲು
ಮುನ್ನುಗ್ಗುವ ಹುಕಿ ಮೊಳೆಯುವುದಾದರೂ ಹೇಗೆ ?

ಮತ್ತೆ ಮತ್ತೆ ಬೇಕೆನಿಸುತ್ತದೆ

ಪ್ರವೀಣಕುಮಾರ್ ಗೋಣಿ

ಸುಖಾಸುಮ್ಮನೆ ಕಾಲವಲ್ಲದ

ಕಾಲದೊಳಗೆ ಸುರಿದು

ಸುಮ್ಮನಾಗುವ ಮಳೆಯಂತೆ

ವಿನಾಕಾರಣ ಕಂಗಳೊದ್ದೆಯಾಗುವಾಗ

ನಿನ್ನ ಅಂಗೈಯ ಬಿಸಿಯನ್ನ ಕೆನ್ನೆ ಬಯಸುತ್ತದೆ .

ಜಿಗಿ ಜಿಗಿಯೆನಿಸುವ ನಗರವೆನ್ನುವ

ನಾಗಾಲೋಟದ ಜಾತ್ರೆಯು

ಸಾಕೆನಿಸಿ ಒಬ್ಬಂಟಿಯಾಗಿ

ತಿರುಗಿ ಬರಲು ದಾರಿಯೇ ಇರದ

ದುರ್ಗಮ ಕಾಡೊಳಗೆ ಕಳೆದುಹೋಗಿಬಿಡಬೇಕೆನ್ನುವ

ಕಾಂಕ್ಷೆ ಕಾಡಿದಾಗಲೆಲ್ಲ ನನ್ನಯ

ಕಿರುಬೆರಳು ನಿನ್ನ ಹಸ್ತದ ಕೊಂಡಿಗೆ ಕಾತರಿಸುತ್ತದೆ .

ನೋಡೊಮ್ಮೆ ನಿನ್ನೊಳಗೇ

 ಪ್ರವೀಣಕುಮಾರ್ .ಗೋಣಿ
ಮನಸು ಬೇಸತ್ತು ಹೋದಾಗ
ತನುವ ಸತುವೆಲ್ಲ
ಆವಿಯಾದಂತಾಗಿ ಬಳಲಿದಾಗ
ಬತ್ತದಂತಿರುವ ಉಲ್ಲಾಸದ
ನಿನ್ನದೇ ಅಂತರ್ಯವನ್ನೊಮ್ಮೆ ಇಣುಕಿ ನೋಡು .

ದಾರಿಗಳೇ ಕಾಣದಾಗಿ
ಕಣ್ಣಿಗೆ ಕಗ್ಗತ್ತಲಾವರಿಸಿ ನಿಂತು
ಸಾಕೆಂದು ಕೈಚೆಲ್ಲಿ ಕೂತಾಗ
ತಗ್ಗಿಸಿದ ನೆತ್ತಿ ಇಟ್ಟುಕೊಂಡೆ
ಒಂದು ಕ್ಷಣಕ್ಕೆ ಅಂತರ್ಯವನ್ನೊಮ್ಮೆ
ಇಣುಕಿ ನೋಡು .

ಎನಿತು ದಕ್ಯಾವು ?

ಪ್ರವೀಣಕುಮಾರ್ ಗೋಣಿ

ಅರ್ಪಣೆ ಈಡಿಯಾಗಿ

ಇರದಿರಲು ಅರಿವಿಗೆ 

ಬಂದೀತೆ ಅವನಿರುವಿನ ಅನುಭಾವ ?

ಅಣು ಅಣುವು ಬಿಸಿಗೆ 

ತನುವೊಡ್ಡಿ ಕೊಳ್ಳದಿರಲು 

ಕೆನೆಗಟ್ಟಿ ಹೋದೀತೇ ಹಾಲು ?

ಅದೆಷ್ಟೋ ಸಲ !

ಪ್ರವೀಣಕುಮಾರ್ ಗೋಣಿ

ನಿಗಿ ನಿಗಿ ನಿಡುಸೊಯ್ಯುವ 

ಸಂಕಟಕ್ಕೆ ಮೌನವೊಂದೇ 

ಸಾಂತ್ವನದ ಸಾನಿಧ್ಯ 

ಕೊಡುವಾಗ ಮತ್ಯಾಕೆ 

ಬೇಕಾಗಿತು ಮಾತಿನಾ ಗೊಡವೆ ?

ಎದೆಯ ಹೊಲದ ಮೇಲೆ 

ನರಳಿಕೆಯ ಗರಿಕೆಯೇ

ಪೊಗಸ್ತಾಗಿ ಹಬ್ಬಿರಲು 

ಹರುಷದ ಹೂವರಳಿಸುವ 

ಕಾಯಕವದು ಅದೆಷ್ಟು ಯಾತನೆಯದು 

ಬಲ್ಲವರಷ್ಟೇ ಬಲ್ಲರು ! 

ಕಂಡೆ ನೋಡ !?

ಪ್ರವೀಣಕುಮಾರ್ ಗೋಣಿ

ನಿನಗೆ ಶರಣಾಗುವಿಕೆಯ 

ಹೊರತು ಮಿಕ್ಕೆಲ್ಲವೂ 

ವ್ಯರ್ಥವೆನಿಸುವ ವೇಳೆ 

ಮಾಯೆ ಅಳಿದು ನಿಂತಿತ್ತು ನೋಡ .

ವಾಸನೆಗಳ ತಾಳಕ್ಕೆ 

ತಕ ತಕನೇ ಕುಣಿದು 

ಮೈಮನಗಳು ದಣಿದಾಗ 

ನಿನ್ನ ಅನುಭಾವವೊಂದೇ ಚಿರವೆನ್ನುವ 

ಅರಿವು ಅರಳಿ ನಿಂತಿತ್ತು ನೋಡ . 

ನೀ ಎನಗೆ !

ಪ್ರವೀಣಕುಮಾರ್ ಗೋಣಿ

ಅಕಾರಣ ಹನಿವ 

ಕಣ್ಣ ಹನಿಗಳೊಳಗೆ 

ನಿನ್ನ ಸಾಂತ್ವನದ 

ಬಿಸಿ ಮತ್ತೆ ಹೃದಯವನ್ನ ಅರಳಿಸುವುದೋ !

ಬೇಡಿಕೆಗಳ ಹೊರೆಯೆಲ್ಲ 

ಹೊತ್ತು ನಿನ್ನೆಡೆ ನಡೆದೆ ನಿಜ ,

ನೀ ಎದುರಾಗುತ್ತಲೇ 

ಬಯಕೆಗಳ ಹೊರೆಯೇ 

ಕರಗಿ ಮತ್ತೆ ಹಗುರಾದೆನೋ ನಾನು ! 

ಅವಳು

ಪ್ರವೀಣಕುಮಾರ್ ಗೋಣಿ

ಅವಳ ಕಣ್ಣಂಚಿನ ಬೆಳಕೊಳಗೆ

ಬದುಕು ಮತ್ತೆ ಚಿಗುರೊಡೆಯುವುದು 

ಕತ್ತಲಿನ ಭಯವ ಅಳಿಸಿ 

ಉಲ್ಲಾಸದ ಅಭಯ ಹೃದಯದೊಳಗೆ ಅರಳುವುದು .

ಉಂಟೆ !?

ಪ್ರವೀಣಕುಮಾರ್ ಗೋಣಿ

ಮಾಯೆಯೆನ್ನುವ ಮಿಥ್ಯದ 

ನರ್ತನದ ತೆಕ್ಕೆಗೆ ಸಿಕ್ಕಿ 

ದುರುಳ ಮನಸಿನ 

ವಶವಾಗುವ ಸ್ಥಿತಿಗಿಂತ 

ಹೀನತೆ ಬೇರೊಂದು ಉಂಟೆ ?

ತೀರದ ದಾಹಕ್ಕೆ 

ತೊರೆಯಲಾಗದ ಮೋಹಕ್ಕೆ 

ಅಂತ್ಯವಿರದ ವಾಸನೆಗಳ 

ಸೆರೆಯಿಂದ ಬಿಡಿಸಿಕೊಳ್ಳಲಾಗದ 

ಪಾಮರತೆಗಿಂತ ಬೇರೆ ನಿಕೃಷ್ಟತೆಯುಂಟೆ ?

ಮಸ್ತಕದೊಳಗಿನ ಮಣಭಾರದ 

ಜ್ಞಾನವನ್ನೇ ಅರಿವ ಕಿರೀಟವಾಗಿಸಿಕೊಂಡು

ತನ್ನ ತಾನೇ ಜ್ಞಾನಿಯೆಂದು 

ಭಾವಿಸಿಕೊಂಡು ಬೀಗುವ ಭ್ರಮೆಗಿಂತ 

ಮತ್ತೊಂದು ಅಜ್ಞಾನ ಉಂಟೆ ?

ನಿನ್ನ ಕಂಡೆ !!

ಪ್ರವೀಣಕುಮಾರ್ ಗೋಣಿ

ಸುಮ್ಮನೆ ನೀರಾಡುವ 

ಕಂಗಳ ಹಸಿಯಲ್ಲಿ ನಿನ್ನ ಕಂಡೆ 

ನಕ್ಕು ಹಗುರಾದಾಗ 

ಸ್ಪುರಿಸಿದ ಸಮಾಧಾನದಲ್ಲಿ ನಿನ್ನ ಕಂಡೆ .

ಸಾಕೆನಿಸಿದ ಬದುಕ ಜಂಜಾಟದಲ್ಲೂ 

ಸೋಕಿದ ಸಂಕಟದೊಳಗೂ ನೀನೇ ಕಂಡೆ 

ಮುಸುಕು ಸರಿಸಿ ಅರಳಿದ 

ಸಂಭ್ರಮದ ಸಡಗರದಲ್ಲೂ ನಿನ್ನನೇ ಕಂಡೆ .

ಪ್ರೀತಿ

ಪ್ರವೀಣಕುಮಾರ್ ಗೋಣಿ

ಪ್ರೀತಿಸಿದಷ್ಟು ಪಡೆಯುತ್ತ ಹೋಗುವೆ 

ದ್ವೇಷಿಸಿದಷ್ಟು ಕಳೆದುಕೊಳ್ಳುತ್ತಾ ಸಾಗುವೆ 

ಸುಮ್ಮನೆ ಪ್ರೀತಿಸು ! ಅಕಾರಣವಾಗಿ ಪ್ರೀತಿಸು !

ಪ್ರೀತಿಯೊಂದೇ ಪವಿತ್ರವಾದುದ್ದು 

ಪರಮ ಅರಿವಿನ ಹಾದಿಯದು ಪ್ರೀತಿ .

ಪ್ರೀತಿಸುತ್ತ ಪಾಮರತೆಯು ಸರಿವುದು 

ಇರುಳು ಸರಿದು ಹಗಲು ಅರಳುವಂತೆ ,

ಪ್ರೀತಿಸುತ್ತಲೇ ಹೃದಯ ಅರಳುವುದು 

ಮೊಗ್ಗುಗಳೆಲ್ಲ ಅರಳಿ ಪರಿಮಳವ ಬೀರುವಂತೆ . 

ಯಾಕೆ ಅಲೆವೇ ನೀ ಮನವೇ ?

ಪ್ರವೀಣಕುಮಾರ್ .ಗೋಣಿ

ಪ್ರೀತಿಯೊಂದೇ ಅವನ 

ತಲುಪಲು ಇರುವ 

ಹಾದಿಯಾಗಿರುವಾಗ ಯಾಕೇ

ಮತ್ತೆಲ್ಲೆಲ್ಲೋ ಅಲೆವೇ ನೀ ಮನವೇ .

ನಿನ್ನೊಳಗೆ ಅವನೇ ಬಿತ್ತಿದ 

ಪ್ರೀತಿಯ ಬೀಜ ಇರುವಾಗ 

ಅದಕ್ಕೆ ನೀರೆರೆದು ಮರವಾಗಿ ಬೆಳೆಸೋ 

ಯಾಕೇ ಮತ್ತೆಲ್ಲೆಲ್ಲೋ ಅಲೆವೇ ನೀ ಮನವೇ .

ಬದುಕು

ಪ್ರವೀಣಕುಮಾರ್.ಗೋಣಿ

ಸಾವಿರ ತಪ್ಪುಗಳ ನಂತರವೂ 

ಮತ್ತದೇ ಪ್ರೀತಿಯಿಂದ ಪೊರೆದು 

ಬಿಗಿದಪ್ಪುವ ತಾಯಿಯಂತಹುದ್ದು ಈ ಬದುಕು !

ಎಲ್ಲಿಂದಾದರೂ ಆರಂಭಿಸಲು 

ಸಾಧ್ಯವಾಗುವಂತಹುದ್ದು 

ಅಸಾಧ್ಯತೆಗಳನ್ನ ಮೀರಲು 

ಅವಕಾಶಗಳ ಬೀಜಕ್ಕೆ ಸತುವೊದಗಿಸುವ 

ಜೀವಸತ್ವದಂತಹುದ್ದು ಈ ಬದುಕು !

ಉಪಲಬ್ಧತೆ

ಪ್ರವೀಣಕುಮಾರ್ ಗೋಣಿ 

ಎದೆಯ ಬಾಗಿಲ ತೆರೆಯದೆ 

ಬಂದು ಪವಡಿಸುವನೇ ಪರಮಾತ್ಮ ?

ಭೋಗದ ಬಲೆಯಲ್ಲಿ ಸಿಲುಕಿ 

ಕಾಣೆಯಾಗಿಹ ಮನಕೆ ತಾಕೀತೆ 

ಅವನ ಬರುವೆಯಾ ಪುಳಕ ?

ಪ್ರೀತಿಯನ್ನೇ ಮರೆತಿರಲು

ಪ್ರವೀಣಕುಮಾರ್ ಗೋಣಿ

20/09/2016

ಪ್ರೀತಿಯ ಪರಿಮಳವಿಲ್ಲದ
ರಸಹೀನ ಬದುಕಿಗಿಂತ
ಚರಾ ಚರಗಳಲ್ಲಿ ಅವನಿರುವ
ಗ್ರಹಿಸದೆ ಗೋಳಾಡುವ ಅಜ್ಞಾನಕಿಂತ
ಬೇರೆ ಪಾಮರತೇ ಉಂಟೇ ?