ಯಾಕೆ ಅಲೆವೇ ನೀ ಮನವೇ ?

ಪ್ರವೀಣಕುಮಾರ್ .ಗೋಣಿ

ಪ್ರೀತಿಯೊಂದೇ ಅವನ 

ತಲುಪಲು ಇರುವ 

ಹಾದಿಯಾಗಿರುವಾಗ ಯಾಕೇ

ಮತ್ತೆಲ್ಲೆಲ್ಲೋ ಅಲೆವೇ ನೀ ಮನವೇ .

ನಿನ್ನೊಳಗೆ ಅವನೇ ಬಿತ್ತಿದ 

ಪ್ರೀತಿಯ ಬೀಜ ಇರುವಾಗ 

ಅದಕ್ಕೆ ನೀರೆರೆದು ಮರವಾಗಿ ಬೆಳೆಸೋ 

ಯಾಕೇ ಮತ್ತೆಲ್ಲೆಲ್ಲೋ ಅಲೆವೇ ನೀ ಮನವೇ .

ಅದ್ಯಾವ ವಿವರಣೆಯ ಗೋಜಿಲ್ಲದೆ 

ಬಯಕೆಗಳ ಹಂಗಿಲ್ಲದೆ 

ಅರಳಿ ಪರಿಮಳ ಬೀರುವ ಹೂವಂತೆ 

ನಿನ್ನ ನೀ ಅರಳಿಸಿಕೊಂಡು ನಲಿಯೋ 

ಯಾಕೇ ಮತ್ತೆಲ್ಲೆಲ್ಲೋ ಅಲೆವೇ ನೀ ಮನವೇ .

ನಮೂನೆಗಳೇ ಇಲ್ಲದ ಮೂಲ 

ಗಂಗೆಯಂತಹುದದು ಪ್ರೀತಿ 

ಸಕಲ ನದಿಗಳೆಲ್ಲ ಹರಿದು 

ಸಾಗರದೊಳಗೆ ಬೆರೆತು ಒಂದಾಗುವಂತೆ 

ನಿನ್ನ ತನುಮನದ ಕಣ ಕಣದೊಳಗೆ 

ಸ್ಪುರಿಸುವ ಪ್ರೀತಿಯನ್ನ ಅವನ ಸಾಗರದೊಳಗೆ 

ಅವಿಭಕ್ತಗೊಳಿಸಿ ಕೊಳ್ಳುವುದ ಮರೆತು 

ಯಾಕೇ ಮತ್ತೆಲ್ಲೆಲ್ಲೋ ಅಲೆವೇ ನೀ ಮನವೇ .