ಕಂಡೆ ನೋಡ !?

ಪ್ರವೀಣಕುಮಾರ್ ಗೋಣಿ

ನಿನಗೆ ಶರಣಾಗುವಿಕೆಯ 

ಹೊರತು ಮಿಕ್ಕೆಲ್ಲವೂ 

ವ್ಯರ್ಥವೆನಿಸುವ ವೇಳೆ 

ಮಾಯೆ ಅಳಿದು ನಿಂತಿತ್ತು ನೋಡ .

ವಾಸನೆಗಳ ತಾಳಕ್ಕೆ 

ತಕ ತಕನೇ ಕುಣಿದು 

ಮೈಮನಗಳು ದಣಿದಾಗ 

ನಿನ್ನ ಅನುಭಾವವೊಂದೇ ಚಿರವೆನ್ನುವ 

ಅರಿವು ಅರಳಿ ನಿಂತಿತ್ತು ನೋಡ . 

ಏನಿದೆಲ್ಲ ವ್ಯರ್ಥ ಎನ್ನುವ 

ಲೌಕಿಕ ಹೇಸಿಗೆ ಎನಿಸಿದಾಗ 

ಮನಸಿಗೆ ಆನಿಕೆಯಾದ 

ಅಲೌಕಿಕದ ಅಮೃತಕ್ಕೆ ಮನ ಹಸಿದಿತು ನೋಡ . 

ಕತ್ತಲೆಯನ್ನೇ ಬೆಳಕೆಂದು 

ಭಾವಿಸಿ ತನಗೆ ತಾನೇ 

ಮರಾಮೋಸಗೊಳಿಸುವ ಮನಸಿನ 

ಭ್ರಾಂತಿ ಅರಿವಾಗುವೆಡೆ 

ನಿನ್ನ ಪ್ರಕಾಶದ ಛಾಯೆ ಪಸರಿತ್ತು ನೋಡ .